.
.

Касцёл святога Юрыя ў Варнянах адзначыў 255 год

06. 10. 2024

5 кастрычніка ў касцёле святога Юрыя ў Варнянах адбылася ўрачыстасць у гонар Маці Божай Ружанцовай. У гэты ж дзень парафія адзначыла 255-годдзе роднай святыні. Трэба адзначыць, што парафія ў Варнянах нашмат старэйшая, ёй 562 гады. Першы касцёл тут з’явіўся ў 1462 годзе. У 1769   быў пабудаваны мураваны касцёл, у якім вернікі праслаўляюць Бога ўжо 255 год.  

          У суботні дзень у Варнянах было мнагалюдна. Шматлікія святары, сёстры законныя, вернікі парафіі і госці прыбылі ў гэты дзень сюды, каб разам памаліцца і прыняць удзел у святкаванні значнай падзеі.

На пачатку з прывітальным словам да прысутных звярнуўся пробашч парафіі ксёндз Віктар Захарэўскі, які прадставіў гасцей свята і заахвоціў вернікаў да шчырай супольнай малітвы.

Святочную Эўхарыстыю ўзначаліў  Біскуп Эмерыт Аляксандр Кашкевіч,  які ў гэты дзень удзяліў 41 верніку парафіі Сакрамэнт Канфірмацыі – сакрамэнт хрысціянскай сталасці. Завяршылася Святая Імша выстаўленнем Найсвяцейшага Сакраманта і ўрачыстай працэсіяй вакол святыні.

          Прыемным момантам стала і тое, што ў гэты дзень у парафіі распачаліся Рэнавацыі Святых Місій, для правядзення якіх, як і год назад, да нас прыбылі айцы-рэдэмптарысты Анджэй Ядкоўскі і Валерый Мазюк. Верым, што дні аднаўлення прынясуць шмат карысці  і пазітыву для варнянскіх вернікаў.

          Цудоўным падарункам для ўсіх прысутных стала тэатральная пастаноўка, падрыхтаваная сіламі парафіяльнага тэатра на чале з пробашчам кс. Віктарам Захарэўскім, якая дакранула кожнага да сівой даўніны, бо расказала пра гады стварэння і развіцця касцёла ў Варнянах.

фота тут

Паважаныя браты і сёстры!

Звяртаемся да вас са шчырай удзячнасцю і любоўю за вашу падтрымку і вернасць нашай святыні. Ваша прысутнасць і ўдзел у жыцці нашай парафіі надзвычай важныя для нас. Мы цэнім кожнага, хто дапамагае падтрымліваць наш касцёл у годным стане праз ахвяраванні і малітвы.

Наш касцёл існуе і развіваецца дзякуючы вашым шчодрым ахвяраванням. Без вашай дапамогі і падтрымкі, нам было б цяжка забяспечыць належныя ўмовы для правядзення службаў, утрымання будынка касцёла.

Калі жадаеце скласці ахвяраванне на патрэбы нашага касцёла, звяртайцеся ў закрыстыю да кс. Віктара. Няхай Бог багаславіць вашыя намаганні і дасць вам моц і спакой.

У закрыстыі  таксама можна:

  • Запісацца на перадшлюбныя заняткі
  • Запісаць дзяцей у Нядзельную школу
  • Падаць інтэнцыю аб малітве за жывых (аб здароўі і Божым Благаслаўленні, аб Божай волі ў складанай сітуацыі і г.д.)
  • Таксама за памерлых
  • Набыць і асвяціць крыжыкі, медалікі, абразы, ваду і г.д.
  • Дамовіцца наконт асвячэння кватэры, крамы, машыны і г.д.
  • Запрасіць святара на цэлебрацыю абраду пахавання, удзялення Сакрамэнту намашчэння хворых.
  • Скласці ахвяраванні на патрэбы дабрачынных арганізацый.

У закрыстыі вы можаце набыць: малітоўнік, спеўнік, свечкі, крыжык, абразы рознага памеру, неабходныя рэчы для шлюбу, хросту и г.д.