На працягу двух дзён – 12 і 13 ліпеня – група нашых вернікаў на чале з пробашчам парафіі ксяндзом Віктарам Захарэўскім гасцявала ў Санктуарыі Маці Божай Каралевы нашых сем’яў у Тракелях.
Маці Божая Тракельская — каталіцкі цудатворны абраз. Знаходзіцца ў касцёле Звеставання Найсвяцейшай Дзевы Марыі ў вёсцы Тракелі Воранаўскага раёна Гродзенскай вобласці. Дэвіз сёлетніх тракельскіх святаў: «Марыя – наша Каралева». У гэтым годзе адзначаецца 15-годдзе з часу каранавання цудадзейнага абраза (5 ліпеня 2009 года кардынал Казімір Свёнтэк усклаў на абраз папскія кароны).
Як і іншыя пілігрымы, варнянцы прыбылі ў гэта дзіўнае месца, каб пакланіцца цудатворнаму абразу, папрасіць заступніцтва Багародзіцы для сваіх родных, падзякаваць за атрыманыя ласкі, схіліўшы галовы ў малітвах, апусціўшыся на каленях, прайсці вакол алтара і дакрануцца рукой да святога абраза.
Акрамя гэтага, Варнянская парафія падчас адпустовых урачыстасцей мела ганаровую місію: дзеці і моладзь парафіі разам з пробашчам ксяндзом Віктарам Захарэўскім, катэхеткай Марынай Бразевіч і іншымі вернікамі правялі Ружанец (Радасную частку), за што мы няспынна дзякуем арганізатарам, у прыватнасці пробашчу касцёла Звеставання Маці Божай Тракельскай ксяндзу-каноніку, кусташу Юрыю Бяганскаму. Юныя вернікі прасілі заступніцтва ў Божай Маці для сваёй Варнянскай парафіі св. Юрыя ў юбілейны для роднай святыні год (255 год з дня пабудовы касцёла св.Юрыя ў Варнянах).
Праграма ўрачыстасцей была разнастайнай і цікавай, незвычайная атмасфера аб’яднала тысячы вернікаў з розных куточкаў Беларусі ў адну вялікую і дружную сям’ю. Верым і спадзяемся, што праз год мы зноў завітаем да Маці Божай ў Тракелі.
Дзева Марыя, руплівая і любая наша Маці, Каралева нашых сем’яў, маліся за нас!..
Паважаныя браты і сёстры! Наш касцёл існуе за кошт ахвяраванняў вернікаў. Шчыра дзякуем усім, хто наведвае нашу святыню і далучаецца да жыцця парафіі праз сайт. Дзякуем усім ахвярадаўцам і молімся за ўсіх Вас.
Калі жадаеце скласці ахвяраванне на патрэбы нашага касцёла, можаце звярнуцца ў закрыстыю да кс. Віктара.
У закрыстыі таксама можна:
У закрыстыі вы можаце набыць: малітоўнік, спеўнік, свечкі, крыжык, абразы рознага памеру, неабходныя рэчы для шлюбу, хросту и г.д.