Варнянскія дзеці праводзяць канікулы з Богам

          На працягу тыдня група дзяцей з Варнянскай парафіі праводзіла канікулы з Богам у Навагрудку. Штодзённыя малітвы, гульні на свежым паветры, экскурсіі, новыя знаёмствы – усё пакінула незабыўны след у сэрцах юных вернікаў. Пра гэта сведчаць шчырыя словы падзякі з вуснаў дзяцей усім тым, хто быў з імі побач:

          Мы шчыра ўдзячны за праведзены час

          У Навагрудку цудоўным у вас.

          Вы нас дагладалі, маліліся з намі,

          Нам крута было кожны дзень разам з вамі!

          Вялікі вам дзякуй ад варнянскіх дзяцей,

          Жадаем здароўя, спаўнення надзей.

          Мы дружна гаворым, упэўнена, хорам:

          Найлепш правадзіць канікулы з Богам!

 

          Сваімі ўражаннямі пра адпачынак падзяліліся некаторыя дзеці:

          Керна Дзмітрый: Правесці канікулы з Богам і са сваімі сябрамі – гэта здорава! Гэта былі незабыўныя дні. Вольнага часу ў нас амаль не было. Кожны дзень пачыналі і заканчвалі малітвай, хадзілі на Святую Імшу, каб разам праславіць Бога. Для нас былі арганізаваны конкурсы, гульні і экскурсіі. Калі прадаставіцца магчымасць, абавязкова пабываю ў Навагрудку яшчэ раз. Вялікая ўдзячнасць нашаму ксяндзу Віктару за гэты тыдзень, праведзены ў цудоўным месцы з Богам і дабром.

          Валэйка Ян: Мне вельмі спадабалася ў Навагрудку ў сёстраў. Час прайшоў непрыкметна і хутка – сумаваць па доме не было калі. Удзячны нашаму пробашчу за арганізацыю паездкі. З задавальненнем паеду яшчэ і яшчэ ў гэта дзіўнае месца.

          Мятлеўскі Мікіта: Мне таксама вельмі спадабалася. Сёстры смачна нас кармілі, вадзілі на экскурсіі, бавілі з намі час карысна і цікава. Удзячны ўсім, хто меў дачыненне да гэтай паездкі.

          Ашоўская Марта: Канікулы з Богам мне вельмі спадабаліся. На падобны адпачынак ездзіла не першы раз і ніколькі не шкадую. Вялікі дзякуй ксяндзу Віктару за арганізацыю нашага адпачынку, а сёстрам Мірыям і Вергініі  за цёплы прыём.

          Альшэўская Ангеліна: Скажу коратка: усё было супер! Добрыя сёстры, вясёлыя гульні, цікавыя экскурсіі! Усім вялікі дзякуй!

          Кармаза Эрнест: Усё вельмі спадабалася, асабліва сёстры, якія за намі даглядалі, смачна кармілі, хваляваліся як за сваіх родных. Яны арганізавалі цікавыя мерапрыемствы для нас. Там я сустрэў свій дзень нараджэння, які не забуду ніколі. Дзякуй усім за адпачынак.

          Сымановіч Васіліна: У Навагрудку была першы раз. Усё прыйшлося даспадобы. Мы з сябрамі добра правялі тыдзень канікул. Аказваецца, канікулы з Богам – гэта зусім не сумна, але вельмі пазнавальна, карысна і цікава.

          Кірпа Ягор: Шчыра дзякую ксяндзу Віктару за прапанову паехаць у Навагрудак, бо гэта быў вельмі добра праведзены час для мяне і маіх сяброў.

          Масевіч Даніэль і Адрыяна: Нам таксама ўсё спадабалася. Мы з братам добра правялі час, за што дзякуем усім, хто да гэтага прычыніўся.

          Лісоўскі Максім: Мне, як і маім сябрам, не хацелася ў апошні дзень адпачынку вяртацца дадому, хацелася застацца там яшчэ крыху. Там незвычайная атмасфера, за што вялікі дзякуй сёстрам і ўсім, хто быў з намі.

          Александровіч Ціхан: Усё спадабалася. Сёстры вельмі добрыя – за ўвесь час ні разу не раззлаваліся на нас. Смачна кармілі кожны дзень. Спадабалася кожны дзень маліцца. Хацеў даўжэй там пабыць.

          Урбановіч Валерыя: Я ў Навагрудку знаходзілася першы раз, мне вельмі там спадабалася. Сёстры былі добрыя і ўважлівыя да кожнага з нас, за што ім вялікі дзякуй. Таксама ўдзячнасць хачу выказаць ксяндзу Віктару, што арганізаваў для дзяцей сваёй парафіі цудоўны і запамінальны час правядзення.

          Клышко Дар’я: А я ездзіла туды другі раз. Са мной былі яшчэ брат і сястра, ім таксама спадабалася. Сёстры Мірыям і Вергінія – проста цуда, яны добрыя, шчырыя і адкрытыя. А яшчэ важатая Ліза Юр’еўна, ёй таксама вялікі дзякуй. Нас смачна кармілі 3 разы на дзень і кожны раз па-рознаму. А асабліва ўдзячна нашаму пробашчу ксяндзу Віктару за тое, што арганізаваў наш адпачынак, а таскама экскурсію ў парк жывёлаў, што знаходзіцца ў Баранавічах.

Ад імя ўсіх бацькоў, чые дзеткі адпачывалі з 30 чэрвеня па 6 ліпеня ў лагеры "Канікулы з Богам" у Навагрудку, звяртаюся са словамі падзякі да ксяндза - пробашча Віктара Захарэўскага.
Паважаны ксёндз Віктар! Дзякуй Вам за духоўнае ўзбагачэнне нашых дзяцей, магчымасць адчуць Божую ласку, любоў, міласэрнасць, узмацненне іх веры ў Бога.
Асобныя словы падзякі за выдатную арганізацыю лагернай змены, экскурсію ў заапарк "Дзіпрыз", арганізацыю ўзаемадзеяння з сёстрамі - назарэтанкамі.
Усё тое,што вы робіце для ўсіх парафіян у цэлым і нашых дзетак у прыватнасці адгукаецца шчырай падзякай, павагай і любоўю ў сэрцах людзей.
Божых Вам ласк і нізкі паклон.
Наталля Александровіч ад імя бацькоў.