Віншавалі пробашча

26 красавіка пробашч Варнянскай парафіі ксёндз Віктар Захарэўскі адзначыў 41 дзень нараджэння. Уся парафіяльная супольнасць: ад найменшага да самага старэйшага верніка – далучылася да віншаванняў. Было сказана шмат цёплых слоў у адрас свайго духоўнага настаўніка, мудрага пастыра і цудоўнага чалавека.

Першымі словы віншавання выказалі самыя маленькія парафіяне:

         Мы яшчэ зусім маленькія,

Але вельмі любім Вас.

Прыміце, наш ксёндз Віктар,

Віншаванні сёння ад нас.

Жадаем Вам моцнага шчасця,

Здароўя, спаўнення надзей,

Заўсёды каб усміхаліся,

А сумавалі радзей.

Да іх далучыліся дзеткі, якія рыхтуюцца да Першай Камуніі:

         У дзень нараджэння, наш пробашч,

Віншуе Вас сёння дзятва,

Якая да Першай Камуніі

Прыступіць праз месяц ці два.

Мы дзякуем Вам за падтрымку,

Малітву і шчырасць да нас,

Хай у кожным жыццёвым учынку

Вас Бог сцеражэ ўвесь час.

Старэйшыя дзеці, якія ўжо не адзін год з’яўляюцца сябрамі касцёла, таксама не маглі не павіншаваць свайго пробашча, які так шмат увагі ўдзяляе дзецям парафіі:

         Мы таксама вельмі прагнем

Сёння Вас павіншаваць.

Гэта – Ваш дзень, Ваша свята,

Таму хочам мы сказаць:

Чалавек Вы мілы, добры,

Любіце Вы нас, дзяцей,

Мы жадаем ласкаў шчодрых

І павагі ад людзей.

З цёплымі словамі звярнулася да пробашча і моладзь:

         Словы ў Ваш адрас, удзячнасць

Моладзь скіроўвае Вам.

За клопат, адкрытасць, магчымасць

духоўна расці ўсім нам.

Шчаслівыя ёсць, што сустрэлі

Мы Вас на жыццёвым шляху,

Любімы наш пробашч, настаўнік,

За Вас мы ўдзячны Хрысту!

Хлопцы-міністранты ў нашай парафіі – сапраўдная дружная каманда, якая годна дапамагае служыць пры Алтары свайму пробашчу. Яны таксама павіншавалі ксяндза Віктара:

         Ксёндз Віктар, ад імя міністрантаў

Віншуем са святам мы Вас.

Мы рады, што дружнай, прыгожай

Камандай зрабілі Вы нас.

Наш пробашч, мы прызнаемся,

Што радасна нам з Вамі быць

І пры алтары штотыднёва

Верай і праўдай служыць.

Ад імя ўсіх сем’яў парафіі ксяндза Віктара павіншавала сям’я Валэйка:

         Мы віншуем Вас з днём нараджэння

Ад імя ўсіх сем’яў парафіі,

І няспынна дзякуем Богу,

Што да нас у Варняны патрапілі.

Вы ўзмацняеце сем’і праз шлюб,

Хрост дзяцей і іх выхаванне,

Вам даверыць можна ўсё

Без малейшага хвалявання.

У гэты дзень гучалі цёплыя словы ад кожнага, хто ведае ксяндза Віктара, хто ў святочны для яго дзень прыйшоў у святыню памаліцца, хто не змог прыйсці, але ў малітвах заўсёды памятае:

         Мы жадаем ад кожнага з нас,

Ад усёй варнянскай супольнасці

Дабрабыту, здароўя, цяпла,

Сіл, цярпення, надзеі і стойкасці.

Хай на Вашым жыццёвым шляху

Непрыемнасці не сустрэнуцца,

А душэўны спакой і падтрымка

Назаўжды ў Вашым сэрцы паселіцца.

Хай Нябесная Маці для Вас

У Сына шчодрыя ласкі выпрошвае.

Ну а мы абяцаем ад нас,

Што заўсёды будзем харошымі.

Павіншаваць свайго пробашча прыехалі і вернікі капліцы св. Філамены (аг.Варона), якія далучыліся да ўсіх віншаванняў і пажадалі ксяндзу Віктару ўсяго самага найлепшага.

Вялікая колькасць віншаванняў сведчыць пра тое, што ксяндза Віктара ў Варнянскай парафіі любяць, цэняць і паважаюць. За 3 гады служэння ў Варнянах ён стаў для кожнага парафіяніна родным чалавекам, які заўсёды гатоў выслухаць, даць параду, падтрымаць, дапамагчы.

Са святам Вас, дарагі ксёндз Віктар!!!