Пробашч парафіі сустрэўся з вучнямі школы

8 красавіка 2021 года ў мясцовай школе прайшло чарговае пасяджэнне ў межах праекта “ШАГ” па тэме “Аб духоўных і маральных каштоўнасцях: дыялог пакаленняў”. Гасцямі сустрэчы сталі ксёндз Віктар Захарэўскі, пробашч  парафіі касцёла Святога Юрыя ў аг.Варняны, і айцец Леанід, настаяцель прыходу Святога прарока Іліі ў вёсцы Альхоўка з абслугоўваннем храма свяціцеля Іаана Шанхайскага і Сан-Францыскага ў аг. Варняны, якія прадэманстравалі міжканфесіянальную згоду ў беларускім грамадстве.

        “Актуальнасць тэмы духоўна-маральнага развіцця моладзі на сучасным этапе відавочная. У свеце ўсё мае сваю каштоўнасць – матэрыяльную і духоўную. Але не ўсе дакладна ведаюць, што такое духоўныя каштоўнасці. У дзяцінстве мы цэнім любоў і клопат дарослых, у падлеткавым узросце пачынаем прывязвацца да матэрыяльных рэчаў, а калі вырастаем – нас можа паглынуць пагоня за матэрыяльнымі каштоўнасцямі” – разважалі госці сустрэчы. Яны скіравалі ўвагу на асноўныя духоўныя каштоўнасці беларускага народа: любоў да Радзімы, цярпімасць, павагу да людзей з іншымі поглядамі, рэлігіяй, талерантнасць, добразычлівасць, гасціннасць, жыццё ў сумленні і іншыя. Проста, даступна, з жыццёвымі прыкладамі стараліся святары растлумачыць школьнікам жыццёвыя ісціны.

         У другой частцы мерапрыемства школьнікі ўключыліся ў дыялог, задавалі цікавячыя іх пытанні гасцям сустрэчы: “Якія маральныя нормы паводзін з’яўляюцца для іх асноўнымі і чаму?”, “Што ў паводзінах людзей асуджаюць больш за ўсё?”, “Што, на іх думку, у большай ступені фарміруе ў чалавеку духоўныя каштоўнасці: сям’я, школа, царква або грамадскасць?”, “У чым бачыцца прычына таго, што многія людзі матэрыяльныя каштоўнасці ставяць вышэй за духоўныя?” і іншыя, на якія атрымалі шчырыя адказы ксяндза Віктара і айца Леаніда.

        Напрыканцы сустрэчы госці пажадалі моладзі развівацца духоўна, паважаць нацыянальныя культурныя каштоўнасці, чалавечнасць, чэснасць, беражлівае захаванне і развіццё культурна-гістрычнай спадчыны, быць талерантнымі, справядлівымі, працалюбівымі, сумленнымі, міралюбівымі, любіць Радзіму, заўсёды прытрымлівацца хрысціянскіх прынцыпаў, мець у сэрцы веру ў Бога, людзей і самога сябе.

з сайта ДУА "Навучальна-педагагiчны комплекс Варнянскi яслi-сад-сярэдняя школа"