Май - месяц Маці Божай

25. 04. 2021

Май месяц у Касцёле асаблівым чынам прысвечаны Маці Божай. Традыцыйныя маёвыя набажэнствы — гэта малітвы, якія на працягу гэтага прыгожага веснавога месяца праводзяць у касцёлах, а таксама каля прыдарожных каплічак і крыжоў.

Маці Божая Марыя адыграла асаблівую ролю ў гісторыі збаўлення, пра што сведчыць Святое Пісанне і аўтэнтычная хрысціянская традыцыя. Яе пасрэдніцтва мы бачым на вяселлі ў Кане Галілейскай, дзе Яна просіць свайго Сына Езуса дапамагчы маладым у складанай сітуацыі, у якую яны трапілі з-за недахопу віна. Езус не адмаўляе сваёй Маці, хоць яшчэ і не прыйшоў Яго час, каб аб’явіць сябе людзям як Месію (пар. Ян 2, 3–9).

Паміраючы на крыжы, Хрыстус не проста даручае Марыю свайму вучню. Апошнія словы Збаўцы гучаць як Ягоны запавет, у адпаведнасці з якім Марыя становіцца Маці кожнага чалавека. Таму хрысціяне слушна лічаць Марыю сваёй Матуляй, Апякункай, Суцяшальніцай і Заступніцай, якая, як праводная зорка, вядзе сваіх дзяцей праз бурлівае мора жыццёвых выпрабаванняў да надзейнага порту — свайго Сына Езуса Хрыста, адзінага пасрэдніка перад Айцом.

Асаблівая роля Марыі ў гісторыі збаўлення вызначае Яе асаблівае месца ў хрысціянскім жыцці і ў кульце Касцёла, які аддае Марыі пашану як першай сярод усіх святых, вышэйшай за анёлаў.

Здаецца, у зялёным, квітнеючым маі, які называецца таксама «траўнем», прыгажосць прыроды асабліва моцна ўплывае на чалавека і яго эстэтычнае пачуццё. Квецень і водар садоў, птушыныя спевы, пяшчотнае цяпло веснавога сонейка… Май, як ніводзін іншы месяц, найлепш адпавядае хараству Панны Марыі — найпрыгажэйшай Кветкі зямлі.

Нягледзячы на тое, што звычай маёвых набажэнстваў у сваім сучасным выглядзе распаўсюдзіўся адносна нядаўна — з сярэдзіны ХІХ ст., — ягоныя карані сягаюць значна глыбей у гісторыю хрысціянства. Паходжанне гэтага набажэнства выводзіцца з хваласпеваў у гонар Панны Марыі, вядомых на Усходзе з V ст.

Хоць на Захадзе ўжо ў першым тысячагоддзі месяц май пачалі асаблівым чынам звязваць з ушанаваннем Багародзіцы, аднак гэта быў толькі пачатак доўгага шляху развіцця нашай прыгожай традыцыі.

Лічыцца, што адным з першых, хто гэтаму паспрыяў, быў кароль Іспаніі Альфонс X (†1284). Пабожны манарх, які сам часта ўдзельнічаў у марыйных набажэнствах, заклікаў да гэтага таксама сваіх падданых. Уласным прыкладам ён заахвочваў іх у маі збірацца ўвечары на супольную малітву каля фігур Маці Божай.

Да распаўсюджвання маёвых набажэнстваў асаблівым чынам прычыніўся таксама благаслаўлёны Генрых Сузо (†1366), вучань Мейстэра Экхарта і сябра Ёгана Таулера — вядомых містыкаў сярэднявечча. У маладосці ён часта ў маі збіраў кветкі дзеля таго, каб упрыгожваць імі фігуру Маці Божай. Пазней гэты нямецкі містык удастоіўся сузіраць тое, як ушаноўваюць Багародзіцу анёлы ў нябеснай хвале.

Росквіт культу маёвых набажэнстваў у Касцёле звязаны з выхадам у свет кнігі пад назвай «Духоўны май».

У гэтым творы, надрукаваным у 1549 г. у Германіі, упершыню май быў названы «месяцам Марыі». Уздым пашаны да Багародзіцы стаў рэакцыяй на скажэнне Яе ролі ў гісторыі збаўлення, што адбывалася ў тыя часы ў працэсе рэфармацыі.

Пазней святы Філіп Нэры (†1595) збіраў дзяцей, каб спяваць пабожныя песні каля абразоў і фігур Маці Божай. Яны не толькі ўшаноўвалі Панну Марыю сваім спевам, але таксама прыносілі Ёй у дар прыгожыя кветкі і свае добрыя намеры і пастановы.

У XVII–XVIII ст. маладыя навіцыі дамініканскага ордэну мелі звычай збірацца ў маі на супольную малітву перад выявамі Панны Марыі. Далейшаму развіццю і распаўсюджванню маёвага набажэнства ў XVIII ст. вельмі моцна паспрыялі айцы ордэна езуітаў, а папа Пій VII устанавіў за ўдзел у гэтым набажэнстве адпуст.

У сярэдзіне ХІХ ст. папа Пій ІХ акрэсліў форму маёвага набажэнства. Яно складалася з Ларэтанскай літаніі да Найсвяцейшай Панны Марыі, казання святара і благаслаўлення Найсвяцейшым Сакрамэнтам.

Таксама і сёння цэнтральная частка маёвага набажэнства — гэта літанія да Найсвяцейшай Панны Марыі.

Маёвыя набажэнствы на ўшанаванне Маці Божай — гэта ўнікальная магчымасць праз малітву, спеў і ціхую асабістую размову даверыць Нябеснай Маці свае справы і клопаты, просячы Яе, каб з матчынай любоўю Яна прадставіла іх свайму Сыну. Прыклад Марыі — гэта самы надзейны шлях, які вядзе да Езуса, а Яе заступніцтва надае малітве хрысціянаў асаблівую моц і скіроўвае яе непасрэдна да Бога.

Май па жаданні Папы Францішка стане месяцам малітвы аб спыненні пандэміі

Папская рада па развіцці новай Евангелізацыі паінфармавала, што, згодна з гарачым жаданнем Святога Айца, май будзе прысвечаны малітоўнаму марафону пад дэвізам «Касцёл нястомна маліўся да Бога (Дз 12, 5)».

Як паведамляе Каталіцкае інфармацыйнае агенцтва КАІ, усе санктуарыі свету стануць месцамі ружанцовай малітвы ў інтэнцыі заканчэння пандэміі з удзелам вернікаў, сем’яў і супольнасцяў.

На афіцыйных каналах Святога Пасаду ў 18.00 (па рымскім часе) будзе транслявацца марыйная малітва з 30-і санктуарыяў свету.

Папа Францішак, як паінфармавала Папская рада па развіцці новай Евангелізацыі, распачне гэтую вялікую малітву 1 мая, а завершыць 31 мая.

 

Літанія да Найсвяцейшай Панны Марыi (Ларэтанская)

Кiрые, элейсон,
       Хрыстэ, элейсон, Кiрые, элейсон,
Хрыстэ, пачуй нас,
       Хрыстэ, выслухай нас.

Ойча з неба, Божа,
       – змілуйся над намі.
Сыне, Адкупіцель свету, Божа,
       – змілуйся над намі.
Духу Святы, Божа,
       – змілуйся над намі.
Святая Тройца, адзiны Божа,
       – змiлуйся над намi.

Святая Марыя,
       – малiся за нас.
Святая Багародзіца,
       – малiся за нас.
Святая Панна над паннамi,
       – малiся за нас.
Мацi Хрыстова,
       – малiся за нас.
Мацi Касцёла,
       – малiся за нас.
Мацi міласэрнасці,
       – малiся за нас.
Мацi ласкi Божай,
       – малiся за нас.
Мацi надзеі,
       – малiся за нас.
Маці прачыстая,
       – малiся за нас.
Мацi беззаганная,
       – малiся за нас.
Мацi непарушная,
       – малiся за нас.
Маці нявінная,
       – малiся за нас.
Мацi наймiлейшая,
       – малiся за нас.
Мацi найцудоўнейшая,
       – малiся за нас.
Мацi добрай рады,
       – малiся за нас.
Мацi Стварыцеля,
       – малiся за нас.
Мацi Збавiцеля,
       – малiся за нас.
Панна наймудрэйшая,
       – малiся за нас.
Панна, хвалы годная,
       – малiся за нас.
Панна праслаўлёная,
       – малiся за нас.
Панна магутная,
       – малiся за нас.
Панна ласкавая,
       – малiся за нас.
Панна верная,
       – малiся за нас.
Люстра справядлiвасцi,
       – малiся за нас.
Сталiца мудрасцi,
       – малiся за нас.
Прычына нашай радасцi,
       – малiся за нас.
Святыня духоўная,
       – малiся за нас.
Святыня хвалебная,
       – малiся за нас.
Святыня слаўная пабожнасцi,
       – малiся за нас.
Ружа містычная,
       – малiся за нас.
Вежа Давiдава,
       – малiся за нас.
Вежа з косцi слановай,
       – малiся за нас.
Залаты доме,
       – малiся за нас.
Каўчэг Запавету,
       – малiся за нас.
Брама нябесная,
       – малiся за нас.
Зорка ранiшняя,
       – малiся за нас.
Аздараўленне хворых,
       – малiся за нас.
Прытулак грэшных,
       – малiся за нас.
Палёгка мігрантаў,
       – малiся за нас.
Суцяшальнiца засмучаных,
       – малiся за нас.
Успамога хрысціянаў,
       – малiся за нас.
Каралева анёлаў,
       – малiся за нас.
Каралева патрыярхаў,
       – малiся за нас.
Каралева прарокаў,
       – малiся за нас.
Каралева Апосталаў,
       – малiся за нас.
Каралева мучанiкаў,
       – малiся за нас.
Каралева веравызнаўцаў,
       – малiся за нас.
Каралева паннаў,
       – малiся за нас.
Каралева ўсiх святых,
       – малiся за нас.
Каралева,
без граху першароднага зачатая,
       – малiся за нас.
Каралева ўнебаўзятая,
       – малiся за нас.
Каралева Ружанца святога,
       – малiся за нас.
Каралева сем’яў,
       – малiся за нас.
Каралева супакою,
       – малiся за нас.
Каралева Беларусі,
       – малiся за нас.

Баранку Божы,
якi бярэш на сябе грахi свету,
       – даруй нам, Пане.
Баранку Божы,
якi бярэш на сябе грахi свету,
       – выслухай нас, Пане.
Баранку Божы,
якi бярэш на сябе грахi свету,
       – змiлуйся над намi.

С.: Малiся за нас, Святая Багародзіца.
Н.: Каб сталiся мы годнымi абяцанняў Хрыстовых.

Молiмся: Просім Цябе, Пане Божа, дазволь нам, слугам Тваім, цешыцца трывалым здароўем душы і цела, і праз слаўнае заступніцтва Найсвяцейшай заўсёды Панны Марыі май ласку вызваліць нас ад цяперашняга смутку і адарыць вечнай радасцю. Праз Хрыста, Пана нашага.
Н.: Амэн.
 

Тваёй абароне

Тваёй абароне аддаемся, Святая Багародзіца, у нашых патрэбах не пагарджай маленнем нашым. I ад усялякай злой прыгоды выбаўляй нас заўсёды, Панна хвалебная i благаслаўлёная.

О Панi наша, Апякунка наша, Суцяшальнiца наша, Ты Заступніца наша, з Сынам сваiм нас паяднай, Сыну свайму нас даручай, Сыну свайму нас аддавай.
 

Малiтва св. Бэрнарда

Памятай, о Найсвяцейшая Панна Марыя, што нiколi не здаралася, каб пакiнула таго, хто да Цябе ўцякае, Цябе на дапамогу клiча, Тваёй апекi просiць. Гэтым даверам натхнёны, да Цябе, о Панна над паннамi i Мацi наша, iмкнуся, да Цябе прыходжу, перад Табою, грэшны, плачучы, стаю. О Мацi Слова, не пагарджай словамi маiмi, але пачуй iх ласкава i выслухай. Амэн.

Паважаныя браты і сёстры! Наш касцёл існуе за кошт ахвяраванняў вернікаў. Шчыра дзякуем усім, хто наведвае нашу святыню і далучаецца да жыцця парафіі праз сайт. Дзякуем усім ахвярадаўцам і молімся за ўсіх Вас.

Калі жадаеце скласці ахвяраванне на патрэбы нашага касцёла, можаце звярнуцца ў закрыстыю да кс. Віктара.

У закрыстыі  таксама можна:

  • Запісацца на перадшлюбныя заняткі
  • Запісаць дзяцей у Нядзельную школу
  • Падаць інтэнцыю аб малітве за жывых (аб здароўі і Божым Благаслаўленні, аб Божай волі ў складанай сітуацыі і г.д.)
  • Таксама за памерлых
  • Набыць і асвяціць крыжыкі, медалікі, абразы, ваду і г.д.
  • Дамовіцца наконт асвячэння кватэры, крамы, машыны і г.д.
  • Запрасіць святара на цэлебрацыю абраду пахавання, удзялення Сакрамэнту намашчэння хворых.
  • Скласці ахвяраванні на патрэбы дабрачынных арганізацый.

У закрыстыі вы можаце набыць: малітоўнік, спеўнік, свечкі, крыжык, абразы рознага памеру, неабходныя рэчы для шлюбу, хросту и г.д.