Віншавалі пробашча

Ксяндзу Віктару Захарэўскаму – 40

         26 красавіка пробашчу нашай парафіі Віктару Захарэўскаму споўнілася 40 гадоў. Шмат слоў гучала ў адрас гэтага адданага святара, шчырага і добразычлівага чалавека, руплівага гаспадара, мудрага настаўніка і дарадцы.

         У гэты дзень на Святой Імшы сабралася шмат людзей, каб сваёй прысутнасцю выразіць удзячнасць і павагу ксяндзу Віктару, памаліцца за яго і выказаць шчырыя словы віншавання і падзякі.  Не маглі не быць у гэты дзень разам з сынам бацькі ксяндза Віктара (мама Данута і тата Ян), а таксама родныя і блізкія людзі. Ксёндз Віктар падчас Імшы дзякаваў бацькам за дар жыцця, а Богу за атрыманыя ласкі на працягу 40 год.

         Пасля Імшы ў адрас ксяндза Віктара гучала шмат цёплых слоў. Дзеці і дарослыя жадалі свайму пробашчу ўсяго самага добрага і светлага:

• Што сорак год?
• Зусім нямнога,

Але паспелі Вы галоўнае спазнаць.

Вы Боскую абралі

для жыцця дарогу.

І многа душ людскіх

змаглі ўратаваць!

 

Вы – нібы промень

дзеля справаў важкіх,

Бо цераз Вас збаўляе Бог людзей.

Хай добры Божа

у кожны момант цяжкі

Напоўніць моцаю

і мудрасцю сваёй!

 

         Прыемным сюрпрызам у гэты дзень для ксяндза Віктара стаў прыезд шаноўных гасцей з Раготна – парафіі, дзе ён да Варнян нёс святарскую службу. Разам са сваім пробашчам кс.Паўлам Скубам дэлегацыя вернікаў пераадолелі 200 кіламетраў, каб павіншаваць дарагога ім чалавека. Яны пажадалі  Божага благаславення, дароў Духа Святога, моцнага здароўя, апекі Божай Маці на кожны дзень, каб ксёндз Віктар і надалей любіў і нёс з радасцю свой крыж, аддана служыў Хрысту і душам парафіянаў.

         На гэтым віншаванні не скончыліся. На наступны дзень сапраўднае свята для свайго святара ўчынілі дзеці, моладзь на чале з катэхэткамі. Дзеці спявалі песні і частушкі, танцавалі, чыталі вершы, выказвалі прыгожыя пажаданні, нават падрыхтавалі квэст для ксяндза Віктара. Упрыгожылі мерапрыемства салодкі стол, конкурсы і дыскатэка.

        

         Паважаны ксёндз Віктар!  Дзякуем Богу за тое, што 2 гады назад Ён прывёў Вас у нашу парафію, дзе за гэты час Вы сталі блізкім і родным кожнаму! Хай рака Вашага лёсу цячэ заўсёды па шчаслівым рэчышчы! Хай злыя вятры ніколі не б’юць Вам у твар, а лагодны цёплы ветрык заўсёды пяшчотна гладзіць Вашу спіну! Хай лёс ніколі не капае на Вас горкімі слязамі з чорных хмар, а сэрца ад крыўды ніколі не есць Вашы пачуцці! Хай не знікае Ваша цярплівасць, не пакідаюць Вас сілы, будзе моцным здароўе і ва ўсім суправаджае поспех! З днём нараджэння, шаноўны і любімы наш ксёндз Віктар!!!